स्वामी स्वरूपानंद लिखित अभंग ज्ञानेश्वरी ‘अध्याय १ ला - अभंग ८७ते१५०गीता स्तुति .ऐकण्यातील हळुवारता.व योग्यता.

स्वामी स्वरूपानंद  लिखित अभंग ज्ञानेश्वरी ‘अध्याय १ ला - अभंग ८७ते१५०

गीता स्तुति .ऐकण्यातील हळुवारता.व योग्यता.

******************************

ऐका परमार्था । जी का जन्म-स्थान । सर्वा रसीं पूर्ण । जगामाजीं ॥८७॥

ऐसी सर्वोत्तम । शुद्ध अनुपम । जी का मोक्ष-धाम । अद्वितीय ॥८८॥

वैशंपायन तो । मुनि तीच कथा । सांगे नृपनाथा । जनमेजया ॥८९॥

जो का भारताचा । सुगंध-पराग । विख्यात प्रसंग । गीतानामें ॥९०॥

यादवांचा राणा । प्रभु कृष्णनाथ । संवादला जेथ । अर्जुनाशी ॥९१॥

व्यासें मंथोनिया । वेदांचा सागर । काढिलें अपार । नवनीत ॥९२॥

ज्ञानाग्नीच्या योगें । कढवितां विवेकें । पावे परिपाकें । साजूकता ॥९३॥

इच्छिती विरक्त । भोगिती जें संत । ज्ञाते रमती जेथ । सोहंभावें ॥९४॥

करावें श्रवण । जें का भक्तजनीं । जें का त्रिभुवनीं । आदिवंद्य ॥९५॥

बोलिलें तें थोर- । भारताचें सार । प्रसंगानुसार । भीष्मपर्वी ॥९६॥

वाखाणिती ज्यास । शिव-ब्रह्मदेव । भगवद्भीता नांव । सुविख्यात ॥९७॥

सेविती जें नित्य । सनकादिक मुनी । विनम्र होवोनि । अत्यादरें ॥९८॥

ऐकण्यातील हळुवारता.

शरद्‌ ऋतूमाजीं । चंद्रकलेंतील । कण जे कोमल । अमृताचे ॥९९॥

करोनियां मन । मृदुल आपुलें । चकोराचीं पिलें । वेंचिती ते ॥१००॥

तैसी च ही अति । हळुवारपणें । कथा श्रोतृजनें । अनुभवावी ॥१०१॥

मूकपणें येथें । करावा संवाद । घ्यावा रसास्वाद । अतींद्रिय ॥१०२॥

बोलाचिया आधीं । प्रमेयाची खूण । घ्यावी आकळून । यथार्थत्वें ॥१०३॥

घेवोनि पराग । भृंग जैसे जाती । परि तें नेणती । पद्म-दळें ॥१०४॥

त्याच परी व्हावी । येथें कुशलता । प्रेमें हा सेवितां । गीता-ग्रंथ ॥१०५॥

चंद्रोदयीं त्यासी । देई आलिंगन । स्व-स्थानीं राहोन । कुमुदिनी ॥१०६॥

कैशा परी घ्यावा । प्रीतीचा संभोग । जाणे सांगोपांग । तीच एक ॥१०७॥

योग्यता

तैसा तो चि जाणे । तत्त्वतां गीतार्थ । गंभीर प्रशांत । चित्त ज्याचें ॥१०८॥

अहो ग्रंथाचें ह्या । करावें श्रवण । पंक्तीसी बैसोन । पार्थाचिया ॥१०९॥

ऐशा योग्यतेचे । तुम्ही संतजन । द्यावें अवधान । कृपाबुद्धी ॥११०॥